parlikakahani: जुलाई 2011

परलीका कहाणी आन्दोलन

डॉ. मदन गोपाल लढ़ा
इक्कीसवैं सईकै रै पैलड़ै दसक री कथा जातरा में बीकानेर संभाग रै हनुमानगढ़ जिलै रो एक छोटो-सो गांव परलीको ठावी ठौड़ बणाई है. अठै रा सत्यनारायण सोनी आपरै पैलै कथा-संग्रै "घमसाण" सूं बरस 1995 में जकी पनीरी तोपी उणसूं लारलै दसक में धपाऊ धान-कथावां निपजी अर केई कथाकार साहित्य रै आभै आपरी चमक दिखाळी है. परलीका नै केन्द्र मानता थकां इणनै परलीका कथा आंदोलण कैयो जा सकै. सोनी रै अलावा रामस्वरूप किसान, भरत ओळा, मेहरचन्द धामू, रामेश्वर गोदारा ’ग्रामीण’, विनोद स्वामी, संदीप धामू रै सागै प्रमोद कुमार शर्मा, पूर्ण शर्मा ’पूर्ण’, मनोज कुमार स्वामी, निशांत आद कथाकारां री पूरी पांत परलीका कथा आंदोलण री न्यारी ओळखाण करावै. घमसाण, जीव री जात, हाड़ाखोड़ी, ताळवै चिप्योड़ी जीभ, डोळ उडीकती माटी, मुकनो मेघवाल अर दूजी कहाणियां, तीखी धार, सेक्टर न. 5, धान कथावां, काचो सूत, सावळ-कावळ अर राम जाणै जैड़ा एक सूं बधता एक संग्रै इण आंदोलण री साख सवाई करै. गांवावूं जीवण रा ए समर्थ चितेरा व्यवस्था री बिड़रूपता, मिनख रै मांयली दोघाचींती, पूंजीवादी ताकतां रै छळ-छद्म, पांखडां अर लुगाई जात री मनगत री मनौवैग्यानिक ढंग सूं पड़ताल करता दीसै.
( 'समकालीन राजस्थानी कहाणी: शिल्प अर संवेदना’ आलेख सूं)

मंगलवार, 5 जुलाई 2011

सर्वाधिक चर्चित : धान-कथावां